Pilosopiya It Paghigugma

Paniiri ka at’ puso sa kapalarang nahuhuman
Ingwa it masadya ingwa ra it kayangkagan
Badaey nato gi-trukisa ka usang kabuhing tugasan
Sa pagpili it paghigugmang imaw yang ra it nauugran.

Kung ka usa ka baguntor naghaharuan sa karampogan
Ka bayangaw sa langit ginghahalaran it uyan
Ka ragat ag langit nakakayumay gimuyatan
Alimbubudog sa buyak masadyang ging-aapunan
Nio pa ara kiong ruhang yanggam nak sa pugar ay masadyang magkaibhanan.

Kung ka usa sa pagkisnit it kilat ging-papahimutan it ligbos
Sa paghaboy it yawa-yawa regalo’y bila-bila ka nakapuros
Takop it mga raho’t huda-huda ka sabat sa mga mapanghapros
Kakwadanan ay agit-it ka ukaw sa hanging gulpi ag ityang gi-yuos

Ag idagak it guyang sa rinagit nak isiw nak sa kabayaka’y ka rugha’y ragling kumupos.

Ka paghiguma’y aya nato gihimuaang nupay idamuan
Nak kung at’ buko gusto ay ibadaan yang sa ruguhan
Hilikitaha ag kap-kapon ka at puso bag-o atubangon ka usang kasablagan
Agor ka usang pagpalanggaa’y hanra miskan kayangkagan man ka rumayan.