Ngayan Sa Baybay

Usang hapong kitang ruha’y makita kuno sa ragat
Ako’y nag-una-unay nak sa bay-bay ka ing ngaya’y isuyat
Sa imo pagtamwa ragli ka nakong sinapoy ag inikag
Sa ngayang ak’ ginghimong marako agor ing mababasa’t mahadag.

Ka ing kasadyaha’y nupay ngasing yang namasran
Habang ikag ka nako’g kitang ruha’y magkarungan
Agor ikaw ay masosorpresa gingtabunan pa nako ka ing minuyatan
Kumulismor ka ‘tong ing ngaya’y hinabas ag waya pa nimo namataan.

Ikaw ay namangit ako’y imo binadaan
Wayaey ka nakatiis ka ing puso’y nagruhaan
Sa rugo it ing rugha’y ka ukaw ay buko ak’ palangga ka
Naghanap ka it iba ag ako nimo’y wayaey’g alibhata.

Bawat hapo’y hali ako sa baktason
Nak nag-aampong kabaypang ako nimo’y ruawon
Ka ing ngayang ak’ huma’y nakaranaey sa mga batong nagpupuyon
Oras-oras ay ak’ ging-mamasrang baka sa uli ay habason.

Sa pagbabantay ako’y pinilay ag wayaey nakatiyaga
Ka naging desisyong sa ak’ rugha’y limtan yangey ka
Umuli sa bayay nak mayangkag ag nagyuyuha
Ugaling miskan niong ak’ buhaton ay asing indi malimtan ka.

Adlaw-adlaw permi yang kang unor it ak’ patsihan
Kada nagpabaktason ako uling kasadyahan nato’y rum-ruman
Rako nakong kalipay ‘tong kitang ruha’y nagkinitaan
Sa tunga pa it ato mga ngayang pareho natong ging-human.