Asing Nio Pa Arang Pagpalangga?

Indiey mabilang ka bisayang ikaw ay ak’ palangga,
sa pramas nak magpati ka yang,
ay asing nio pa ara ka hanap nimo sa akong,
waya ako nimo nasabta?

Ako ging-taoy ka tanan-tanan sa imo,
miskan mawar-aney ako,
ay asing nio pa ara ka hanap nimo sa akong,
waya pa gihapon nimo ako nasabta?

Gingpanglimtaney sa ako rughan ka mga rayaga,
agor ing masasadurang ikaw ay ausa,
ay asing nio pa ara ka hanap nimo sa akong,
ako’y waya pa nimo’g sabta?

Ako’y nagpangpangutanay sa mga mga pantas,
sa pramas nak makatuo’t bibisar-ong pangpalangga,
ay asing nio pa ara ka hanap nimo sa akong,
waya ray nimo ako’g ablihata?

Ako ging-libotey ka kalibutan,
sa pramas nak maghanap it romantikong lugar para yang sa ruhaan,
ay asing nio pa ara ka hanap nimo sa akong,
tong ging-ikag ka nako’y imo pinaindian?

Ap-at nak rugo’t sangkadutaa’y ak’ naabaya pa,
sa pramas nak ngayan nimo’y maipasador ninra,
ay asing nio pa ara ka hanap nimo sa akong,
kasadyahan sa ing rugha’y indi ak’ makita?

Nakaabotey ako sa baguntor it Olimpo,
sa pramas nak maghagar yang it mga payo sa mga d’yosa’g d’yoso,
ay asing nio pa ara ka hanap nimo sa akong,
ako’y ityang nimo talikori?

Ging-amigoy nako si hanging Amihan,
sa pramas nak ngayan nimo’g ako’y ihing-hing sa sangkatawohan,
ay asing nio pa ara ka hanap nimo sa akong,
talinga ninra’y imo ging-tabunan?

Tanan pang mga konstilasyon ay ako ging-agtuan,
agor ka ing ngaya’y magrana sa kalangitann
ay asing nio pa ara ka hanap nimo sa akong,
ka ing uyo’y ityang nimo suongan?

Sa huli’y akoey ging-halar ka pagpalanggang yuhaan,
nak kabaypang ka ing magustoha’y pulos kalipay nak kamo’y mag-inibhanan,
ay rakong nakong kibot tong ako’y imo rinagok,
ag silinggong rughan nimo’y ako tinuslok.