Panangop Nak Pagpalangga

Asa baktason kang ikaw ay ak’ makita.
ka ing mga mata’y nakahunat sa yawor.
sa pagpayungot nako sa imo’y ka ing uda’y indi maipinta
ag ak’ tong muyatan ka ing rugha’y asing buko ing raya?

Rinakop sanakraan nimo ka ak’ rughan
dahil siling nimo’y imo ag ako’y pareho yang.
pagkatapos nabayaka ako sa kalipay nak ing namasran
‘tong ‘ak rugha’y sa imo’y binuhian sa gibahan.

Kitang ruha’y sa pag-estoryaha’y nagabhian
nagmamasir sa ato’y mahadag nak buyan
tong marugayey ikaw ay ako hinaruan
pasensya yang miskan ako’y imo hangitan.

‘Tong kitang ruha’y magkadistansyahan
nakibot akong asing ako’y imo binudotan
haro nimo sa ako’y wayaey ak’ napigahan
hanggang kita’y ruha’y nagligir sa kabay-bayan.

Siling nimo’y kupkop nako’y hugotan
dahil ka gusto nimo’y indi ka ak’ mabadaan
bag-o nato tunaan kabaypang sa ing patsiha’y rumruman
na kitang ruha’y sa kalipaya’y dapat magrungan.

Sa primero’y nupay kitang ruha’y maanar nak tupa
asing kag marugay-rugay nupay takay nak nagwawanrang pa
pilang minuto’y bisti natong ruha’y sa hanginey makikita
hanggang ka bilog nak buya’y nagpalipor sa karampogang nahuhuda pa.

Naghahangos kang tong inuyunan nimo ka ak’ rughan
pangutana nako’y asing ngasing yang ka ak’ namataan
sabat nimo’y ikaw ay imbitado sa usang kasayan itkuman
kinaagaha’y mapauliey ka sa imo ging-rak-an.

Kada aga-aga pa yang ako’y nagpapantalan
para silinggong ikaw ay asa ako rughan
ugaling kalisor sa ako’y umutwang
'tong silinggon nimong ging-huhuyatey ka’t imo klarong karughan.